ਮਕਸੂਦਾਂ ਸਬਜ਼ੀ ਮੰਡੀ ਵਿੱਚ ਵੈਰਕਾ ਮਿਲਕ ਬੂਥ ਤੋਂ 40 ਹਜ਼ਾਰ ਦੀ ਚੋਰੀ, ਸੀਸੀਟੀਵੀ ਵਿੱਚ ਕੈਦ

ਮਕਸੂਦਾਂ ਸਬਜ਼ੀ ਮੰਡੀ ਵਿੱਚ ਸਥਿਤ ਵੈਰਕਾ ਮਿਲਕ ਦੇ ਇੱਕ ਬੂਥ ਦੇ ਗੱਲੇ ਵਿੱਚੋਂ ਚੋਰ ਕਰੀਬ 40 ਹਜ਼ਾਰ ਰੁਪਏ ਚੁਰਾ ਕੇ ਫ਼ਰਾਰ ਹੋ ਗਿਆ। ਚੋਰੀ ਦੀ ਇਹ ਪੂਰੀ ਘਟਨਾ ਉੱਥੇ ਲੱਗੇ ਸੀਸੀਟੀਵੀ ਕੈਮਰੇ ਵਿੱਚ ਕੈਦ ਹੋ ਗਈ ਹੈ। ਇਸ ਸਬੰਧੀ ਥਾਣਾ ਨੰਬਰ ਇੱਕ ਦੀ ਪੁਲਿਸ ਨੂੰ ਸ਼ਿਕਾਇਤ ਦਿੱਤੀ ਗਈ ਹੈ।

ਜਾਣਕਾਰੀ ਦਿੰਦਿਆਂ ਸੱਨੀ ਨੇ ਦੱਸਿਆ ਕਿ ਬੁੱਧਵਾਰ ਸ਼ਾਮ ਕਰੀਬ ਸਾਢੇ ਛੇ ਵਜੇ, ਜਦੋਂ ਉਸਦੇ ਪਿਤਾ ਕਿਸੇ ਕੰਮ ਕਾਰਨ ਬੂਥ ਤੋਂ ਬਾਹਰ ਗਏ ਹੋਏ ਸਨ, ਤਾਂ ਇਸ ਦੌਰਾਨ ਇੱਕ ਨੌਜਵਾਨ ਗਾਹਕ ਬਣ ਕੇ ਬੂਥ ਵਿੱਚ ਆਇਆ। ਬੂਥ ਅੰਦਰ ਕਿਸੇ ਨੂੰ ਨਾ ਵੇਖ ਕੇ ਉਸ ਨੇ ਕਾਊਂਟਰ ਉੱਤੇ ਚੜ੍ਹ ਕੇ ਗੱਲੇ ਵਿੱਚ ਪਏ ਲਗਭਗ 40 ਹਜ਼ਾਰ ਰੁਪਏ ਕੱਢ ਲਏ।

ਇਸੇ ਸਮੇਂ ਜਦੋਂ ਸੱਨੀ ਦੇ ਪਿਤਾ ਵਾਪਸ ਬੂਥ ਵਿੱਚ ਦਾਖ਼ਲ ਹੋਏ ਤਾਂ ਉਨ੍ਹਾਂ ਨੇ ਚੋਰ ਨੂੰ ਗੱਲੇ ਵਿੱਚੋਂ ਪੈਸੇ ਕੱਢਦੇ ਹੋਏ ਦੇਖ ਲਿਆ ਅਤੇ ਉਸਨੂੰ ਫੜਨ ਦੀ ਕੋਸ਼ਿਸ਼ ਕੀਤੀ, ਪਰ ਚੋਰ ਮੌਕੇ ਤੋਂ ਭੱਜਣ ਵਿੱਚ ਕਾਮਯਾਬ ਹੋ ਗਿਆ। ਉਨ੍ਹਾਂ ਵੱਲੋਂ ਸ਼ੋਰ ਮਚਾਉਣ ਦੇ ਬਾਵਜੂਦ ਵੀ ਚੋਰ ਕਿਸੇ ਦੇ ਹੱਥ ਨਹੀਂ ਆਇਆ।

ਸੱਨੀ ਨੇ ਦੱਸਿਆ ਕਿ ਚੋਰੀ ਦੀ ਪੂਰੀ ਵਾਰਦਾਤ ਸੀਸੀਟੀਵੀ ਕੈਮਰੇ ਵਿੱਚ ਕੈਦ ਹੋ ਚੁੱਕੀ ਹੈ ਅਤੇ ਪੁਲਿਸ ਨੂੰ ਸ਼ਿਕਾਇਤ ਦੇ ਨਾਲ-ਨਾਲ ਸੀਸੀਟੀਵੀ ਫੁਟੇਜ ਵੀ ਸੌਂਪ ਦਿੱਤੀ ਗਈ ਹੈ। ਉੱਥੇ ਹੀ ਪੁਲਿਸ ਵੱਲੋਂ ਚੋਰ ਦੀ ਪਛਾਣ ਕਰਨ ਲਈ ਜਾਂਚ ਕੀਤੀ ਜਾ ਰਹੀ ਹੈ।